МАЗМҰНЫ

1. Қолданылу саласы
2. Нормативтік сілтемелер
3. Магистранттар мен докторанттардың ғылыми тағылымдамасын ұйымдастыру мен өткізудің мақсаты мен міндеттері
4. Магистранттар мен докторанттардың ғылыми тағылымдамадан өту тәртібі және мерзімі
5. Магистранттар мен докторанттардың ғылыми тағылымдамадан өту ақысын төлеу тәртібі
6. Осы Ережеге өзгерістер енгізу тәртібі

1. Қолданылу саласы
1.1 Магистранттар мен докторанттардың ғылыми тағылымдамасын ұйымдастыру және өткізу ережесі (бұдан әрі – Ереже) ҚР БҒМ ҒК Ахмет Байтұрсынұлы атындағы Тіл білімі институтында (бұдан әрі – Институт) жоғары оқу орындарының жоғары білімнен кейінгі білім алушыларының (бұдан әрі – магистранттар мен докторанттар) ғылыми тағылымдамадан өту тәртібін белгілейді.
1.2 Осы Ережені жоғары оқу орындарының ғылыми тағылымдамадан өтетін магистранттары мен докторанттары, олардың ғылыми жетекшілері, кафедра меңгерушілері, кураторлары, топбасшылары және Институтта ғылыми тағылымдамаға консультант ретінде бекітілген қызметкерлер, бөлім меңгерушілері негізгі нұсқаулық ретінде қолданады.

2. Нормативтік сілтемелер
2.1 Осы Ережені әзірлеу барысында төмендегі нормативтік құқықтық құжаттар пайдаланылды:
- «Білім туралы» 2007 жылғы 27 шілдедегі № 319 Қазақстан Республикасының Заңы (өзгерістер мен толықтырулар енгізілген нұсқасы жаңа редакцияда, ҚР 04.07.2018 № 171-VI);
- «Жоғары оқу орнынан кейінгі білім берудің мемлекеттік жалпыға міндетті стандарты» туралы Қазақстан Республикасы Үкіметінің 2012 жылғы 23 тамыздағы № 1080 қаулысы;
- «Білім берудің тиісті деңгейлерінің мемлекеттік жалпыға міндетті білім беру стандарттарын бекіту туралы» ҚР БҒМ 2018 жылғы 31 қазандағы № 604бұйрығы;
- «Тиісті үлгідегі білім беру ұйымдары қызметінің үлгілік қағидаларын бекіту туралы» Қазақстан Республикасы Білім және ғылым министрінің 2018 жылғы 30 қазандағы № 595 бұйрығы;
- «Оқытудың кредиттік технологиясы бойынша оқу процесін ұйымдастырудың қағидаларын бекіту туралы» ҚР БҒМ 2011 жылғы 20 сәуірдегі №152 бұйрығы, ҚР БҒМ 2018 жылғы 12 қазандағы №563 өзгерістер мен толықтырулар енгізілген бұйрығы;
- «Жоғары және жоғары оқу орнынан кейінгі білімі бар кадрларды даярлау бағыттарының сыныптауышын бекіту туралы (Классификатор)» ҚР БҒМ 2018 жылғы 13 қазандағы № 569 бұйрығы;
- «Жоғары және жоғары оқу орнынан кейінгі білім беру бойынша қаржылық нормативтерді бекіту туралы» ҚР БҒМ 2009 жылғы 7 тамыздағы № 374 бұйрығы;
- «Бюджет қаражаты есебінен қызметтік іссапарларға, оның ішінде шет мемлекеттерге қызметтік іссапарларға арналған шығыстарды өтеу қағидаларын бекіту туралы» Қазақстан Республикасы Үкіметінің 2018 жылғы 11 мамырдағы № 256 қаулысы;
- Институттың Жарғысы және өзге де нормативтік актілері.

3. Магистранттар мен докторанттардың ғылыми тағылымдамасын ұйымдастыру мен өткізудің мақсаты мен міндеттері
3.1 Магистранттар мен докторанттарды ғылыми тағылымдамасын ұйымдастыру мен өткізу білім беру мен ғылымды дамытудың қажеттіліктеріне жауап беретін ғылыми-практикалық қарым-қатынастар орнату негізінде ғылыми зерттеулердің сапасы мен тиімділігін арттыру мақсатында жүргізіледі.
3.2 Ғылыми тағылымдаманың міндеттері:
- теориялық білімдерді, дағдылар мен машықтарды бекіту және дамыту;
- ғылыми-зерттеу жұмыстарын дайындау мен жүргізудің әдістемесін меңгерту;
- магистр және PhD докторы дәрежесін алу үшін дайындалатын диссертацияларды қорғауға дайындық әдістемесін меңгерту;
- ғылыми зерттеулерді жүргізудің практикалық тәсілдерін меңгерту;
- жаңа теориялық, әдістемелік және технологиялық жетістіктермен таныстыру;
- ғылыми зерттеулерді қазіргі заманғы әдістермен жүргізуге, деректерді жинауға, өңдеуге және интерпретациялауға көмектесу.

4. Магистранттар мен докторанттардың ғылыми тағылымдамадан өту тәртібі және мерзімі
4.1 Магистранттар мен докторанттарды ғылыми тағылымдамадан өткізу жоғары оқу орындары мен Институт арасында жасалған шарттар, келісімдер, меморандумдар шеңберінде және осы Ережеге сәйкес жүзеге асырылады.
4.2 Магистранттар мен докторанттардың ғылыми тағылымдамадан өту мерзімін жіберуші жоғары оқу орны белгілейді.
4.3 Магистранттар мен докторанттардың ғылыми тағылымдамасы ғылыми және өндірістік бағытта жүзеге асырылады.
4.4 Институт ғылыми тағылымдамадан өтетін магистранттар мен докторанттарға ғылыми консультанттар бекітеді.
4.5 Ғылыми тағылымдамадан өтетін магистранттар мен докторанттарға бекітілген ғылыми консультанттардың міндеттері:
- ғылыми тағылымдаманың жоғары ғылыми-әдістемелік және практикалық деңгейде өтуін қамтамасыз ету;
- магистранттар мен докторанттарды ғылыми тағылымдамадан өту тәртібімен таныстыру және оның сақталуын қамтамасыз ету;
- магистранттар мен докторанттарды Институттың ішкі еңбек тәртібімен, ғылыми тағылымдамадан өту тәртібімен, Институт кітапханасымен таныстыру;
- магистранттар мен докторанттардың диссертациялық жұмыстары бойынша ғылыми кеңес беру, ғылыми мақала жазуға көмектесу және ғылыми-өндірістік тапсырмалар беру;
- магистранттар мен докторанттарға кәсіптік бағдар жұмыстарын жүргізу.
Ғылыми консультанттардың міндеттері ғылыми тағылымдаманың мерзіміне байланысты жоғарыда аталған міндеттердің бірнешеуін немесе барлығын қамтуы мүмкін.
4.6 Ғылыми тағылымдамадан өтіп жатқан магистранттар мен докторанттар Институттың кітапханасын пайдалануға, ғылыми консультантпен қатар басқа да ғалымдардан кеңес алуға құқылы.
4.7 Ғылыми тағылымдамадан өтіп жатқан магистранттар мен докторанттардың міндеттері:
- Институттың ішкі тәртібі мен ережелерін сақтау;
- Институттың ғылыми-практикалық іс-шараларына (жиналыстар, конференциялар, семинарлар және т.б.) қатысу;
- ғылыми консультант берген тапсырманы уақытында және сапалы орындау;
- ғылыми тағылымдаманы аяқтаған соң ғылыми тағылымдама туралы есеп өткізу.
4.8 Магистранттар мен докторанттардың ғылыми тағылымдамадан нәтижелі өтуін олардың кураторлары, топбасшылары (старосталары) бақылайды және жауапты болады.
4.9 Магистранттар мен докторанттарға бекітілген ғылыми консультанттың ғылыми тағылымдаманы тиісті деңгейде жүргізілуін бақылау бөлім меңгерушісіне жүктеледі.
4.10 Институт ғылыми тағылымдамадан өткен магистранттар мен докторанттарға сертификат береді.

5. Магистранттар мен докторанттардың ғылыми тағылымдамадан өту ақысын төлеу тәртібі
5.1 Магистранттар мен докторанттардың ғылыми тағылымдамадан өту ақысын оларды жіберуші жоғары оқу орны Институттың шотына ақша қаражатын аудару арқылы төлейді.
5.2 Магистранттар мен докторанттардың ғылыми тағылымдамадан өту ақысы Қазақстан Республикасының заңнамасына және Институттың 2021 жылғы 5 мамырдағы № 15 бұйрығымен бекітілген Баға прейскурантына, сонымен қатар жіберуші жоғары оқу орны мен Институттың өзара келісімі негізінде жасалған шартта көзделген талаптарға сәйкес белгіленеді.
5.3 Магистранттар мен докторанттарды ғылыми тағылымдамадан өткізу үшін жіберуші жоғары оқу орны Институттың шотына аударған ақша қаражатының 60 (алпыс) пайызы ғылыми консультантқа төленеді, 40 (қырық) пайызы Институт қызметіне жұмсалады.
5.4 Ғылыми тағылымдамадан өтетін магистранттар мен докторанттардың ғылыми консультанттарына төленетін ақы олармен жасалған келісімшартта белгіленеді.
5.5 Жоғары оқу орындарының жолдамасынсыз, өз беттерінше ғылыми тағылымдамадан өтуге тілек білдірген магистранттар мен докторанттар ғылыми тағылымдамадан өту ақысын өз есептерінен төлейді.

6. Осы Ережеге өзгерістер енгізу тәртібі
6.1 Осы Ережеге бекітілген күннен бастап күшіне енеді және өзгерістер мен толықтырылғанға немесе жаңа ереже қабылданғанға дейін қолданылады.
6.2 Осы Ережеге өзгерістер енгізу Қазақстан Республикасының заңнамасына сәйкес, Институттың Ғалымдар кеңесінің шешімімен Институт директорының бұйрығымен бекіту негізінде жүзеге асырылады.
6.3 Осы Ережеге және оның орындалуына қатысты кез келген бұйрық және басқа да нормативтік актілер осы Ережеге қосымша тігіледі.
6.4 Осы Ереженің түпнұсқасы Институттың кадр және құқықтық құжаттармен қамтамасыз ету бөлімінің меңгерушісінде сақталады.
6.5 Осы Ереженің жұмыс данасын сақтау, көбейту және қолданушыларға жіберу бойынша жауапкершілік директордың ғылым жөніндегі орынбасарына жүктеледі.